مستوى اول

السلام عليكم ورحمة الله وبركاتة 

كيف حالكم ؟ ان شاء الله كلكم طيبين 

اليوم راح احكي لكم عن المواد الدراسية تبع مستوى الاول من ناحية 

لغة المادة + مدى صعوبتها + متطلباتها + نصائح تمنيت أحد عطاني اياه قبل اخذ المادة  

في مستوى اول راح تدرسون 5 مواد فقط بالنسبة الي ماراح تحذف مادة أو تضيف مادة 

* التحرير الكتابي : 

المادة موحدة على جميع كليات الجامعة  يعني لو حابة تاخذينها من كليه ثانية غير كلية الحاسب عادي لان الفاينل موحد لكل الكليات 

لغة المادة / المادة درسناها بالعربي .. 

المادة تعتبر جدا سهله لكن صعوبتها كانت ان التشابترز كانت كثثيرة مره وطويله  والمذاكرة كانت ملزمة 70 صفحة ان شاء الله ما زادوها ،، المادة هذي ما قدر افيدكم فيها كثير لان لكل تيتشر توزيع ومتطلبات غير عن الثانية .. أنا درستني وحده الله يذكرها بالخير مرره حبيتها  كانت دكتورة ومثقفة ومتعاونة و أدت أمانتها على أكمل وجه في أخر الترم جت وحده بدالها لان تيتشرتنا القديمة صارت  في منصب ادراي .. 

متطلباتها / 

المشروع ( 10 درجات ) : طلبت منا مشروع قسمتنا مجموعات كان عبارة عن عرض بوربوينت ونشرحه و نوزع على الطالبات مطوية أو نسوي مسابقة و نرتب شغلنا كله في ملف ونعطيها اياه  ..

2 ميدز ( 15 درجة لكل ميد )  : كله اختياري وصح وخطا  .. 

ما كان فيه واجبات  .. الفاينل عليه 50 درجة .. 

* فيزياء عامة : 

لغة المادة / المادة من كلية العلوم درسناها بالانقلش  ..

المادة فيها جزئين جزء عملي ونظري نفس الماث تبع التحضيري .. الجزء عملي عندنا محاضرة وحدة اسبوعيا لمدة ساعتين نروح المعمل كان بكلية التربية حسبي الله عليهم يعني خلصت الكليات عشان نروح للتربية المشكلة محد يستفيد منه الا احنا وكلية العلوم لو هم حاطينه عند محطتنا ابرك لهم   .. كنا نسوي تجارب طبعا اول كان على بالنا نسوي تجارب على النظريات الي ناخذها بالجزء النظري طلعت مخلتفة  لكل جزء شي خاص فيه يعني الجزء العملي كان له سلايدات ( عرض بوربوينت ) خاصه فيه والعملي كان له ملزمة خاصة فيه .. بتكلم لكم عن الجزء العملي بشكل تفصيلي المذاكرة من ملزمة ولازم نجيبها معنا كل محاضرة ولا ننقص    .. كل اسبوع ناخذ تجربة ونطبقها في نفس المحاضرة ونكتب ملاحظتنا على الملزمة وبعض التجارب فيها رسمة نرسمها بعدين تروحين للتيتشر تصحح لك وتعطيك درجة المشاركة اذا ما طبقتي راح تنقصين  .. وقتها كان فيه بنات ينقلون الحل من بعض لانه نفس الجواب والرسمة وهذا اكبر غلط لازم كل وحده تجرب بنفسها وتشوف الجواب كيف يطلع لان بالفاينل محد راح يساعدك ولا يعطيك الحل   ..  الجزء النظري كان محاضرة وحدة اسبوعيا لمدة ساعتين .. المادة مو سهلة لانها كانت كثثثثثثيييييييرررة جددا  وفيه بنات كان يلقون صعوبة من التيتشر نفسها الي تدرسهم مثلا تكون ما توصل المعلومة صح أو ما تشرح بشكل واضح ..

متطلباتها / 

الجزء العملي ( 40 درجة ) :  2 ميدز كله اختياري وصح وخطا ما فيه تطبيق على تجربة لان ما فيه اجهزة تكفي  الميد الاول عليه ( 7 درجات ) الميد الثاني عليه  ( 8 درجات ) + مشاركة ( 5 درجات )  الي هي تطبيقك وقت المحاضرة  + فاينل ( 20 درجة ) ..      

الجزء النظري : ما اتذكر بالظبط كم كان عليه  بس كان فيه 2 ميدز + 2 كويزز + واجبات وحضور وغياب  .. 

 المادة مافيها مشروع 

نصيحة /

1. كتاب الفيزياء تبع أول ثانوي لا ترمونه لا ترمونه شوفي اخوك بنت خالتك بنت الجيران اهم شي تحصلينه  لان كل الجزء نظري نفسه بس مترجم للانقلش  ..

2. مثل ما انتو عارفين المادة بالانقلش وكثيرة فصعب عليكم وقت المذاكرة تترجمون كلمة كلمة  خصوصا ان المادة علمية ف الكلمات بتكون اول مره تمر عليكم لانها مصطلحات علمية مثل الضغط الجوي والتوتر السطحي وكذا ف اطبعوا السلايدات أول بأول وقولوا للتيتشر وهي تشرح تترجم واكتبوا الشرح معها  حتى فيه اسئلة مو محلوله بالسلايدات تحصلون حلها بالكتاب  ..

* التراكيب المحددة : 

لغة المادة / مثل ما قلت قبل كل مواد كلية الحاسب تدرس باللغة الانجليزية  .. 

 المادة جدا ممتعة و سهله  أغلبها فهم ما فيها حفظ كثير ولا قوانين كثيرة صعوبتها في شيء واحد اذا غبتي عن محاضرة وحده تضيعين لانها مررره مرتبطه في بعض وكل تشابتر ( فصل ) مرتبط باللي قبله  ..  المذاكرة من السلايدات ( عرض البوربوينت )  .. واجباتها كثيرة بس سهله بالنسبه للمواد الثانية  ..

متطلباتها /  

3 كويزز ( 5 درجات لكل كويز ) ..

المشاركة والحضور والغياب ( 5 درجات ) ..

الواجبات ( 10 درجات لكل واجب درجتين ) :  كثيرة بس سهله بالنسبه للمواد الثانية  ..

2 ميدز ( 15 درجة لكل ميد ) : كان شامل كل شيء اختياري وصح وخطا واسئلة وحل طبعا لا تنسون لكل تيتشر طريقة خاصة في كتابة اسئلتها .. 

الفاينل (60 درجة ) .. 

 المادة مافيها مشروع 

نصيحة /

 أنا من عادتي ما طبع السلايدات واجيب معي الايباد أتابع منه   بس هذي المادة احتجت اني اطبعها لانو فيها اسئلة مو محلوله و تحتاجين تحلينها مع التيتشر وقت المحاضرة  +  فيها مصطلحات تحتاج ترجمة وشرح من التيتشرعشان في وقت المذاكرة ما تاخذين وقت كثير وانتي تذاكرين  ...  

* حساب التفاضل والتكامل :

يعني رياضيات  .. 

لغة المادة /  المادة درسناها بالانقلش والمادة من كلية العلوم ..

هذي أكثر مادة من هذا المستوى أنا واغلب البنات عانينا منها  بسبب أغلبية التيتشرات الي يشرحون هذي المادة دكتورات وتقريباً أعمارهم كبيره وغير متمكنين من المادة وصعب التفاهم معهم .. والمذاكرة كانت من كتاب مو موجود في مكتاباتنا حالياً ف راح تضظرون انكم تطبعونه .. المنهج كان كثير وهذي المادة لها جزئين بعد نفس الفيزياء جزء عملي وجزء نظري.. الجزء النظري المحاضرة كانت ساعتين اسبوعيا أغلب التيتشرات تجي وتكتب في السبورة ما تخلي فيها لون ابيض نصيحة لا تكتبون معها  لان كل الكلام موجود بالكتاب بس خططوا عليه واكتبوا عليه الشرح  .. من ناحية شرحها كان مفهوم بس تشرح على اشياء بسيطة مافيها جذر ولا كسر يعني ارقام عادية و ننصدم في الاختبار ما يكون سهل مثل امثلة الي تشرح عليها وفوق هذا كله حتى الكتاب مبسط ما يشرح بشكل تفصيلي ابداً  .. نهاية المحاضرة راح تعطيكم فوق العشرة اسئلة واجب .. نجي للجزء العملي راح تدرسكم تيتشر ثانية و المحاضرة عبارة عن ساعتين اسبوعيا تفتش عن الواجب و تحلون معها اسئلة الواجب وتمارين الكتاب..

متطالبتها /

الفانيل عليه  ( 50 درجة ) .. 

الجزء النظري عليه 40 درجة : 2 ميدز ( 15 درجة لكل ميد ) + 2 كويزز (5 درجات لكل كويز )  .

الجزء العملي عليه 10 درجات : كل تيتشر وحسب تقسيمها تيتشرتي كانت مقسمتها 5 درجات مشاركة وحضور وغياب وحل الواجب + 5 درجات كويز عملي ..

 المادة مافيها مشروع 

نصيحة / 

1. شيكوا على  صفحة المراجعة نزلت فيها اشياء مهمة تخص المادة  ..

2. كثير يقولون ذاكري كل المواد أول بأول واحنا نتحمس بالاول بعدين نتكاسل بسبب الضغوط الدراسية من واجبات ومشاريع  لكن الا هذي المادة احرصي دائما انك تذاكرينها أول بأول وتحلين الواجبات بنفسك وترا الحل مو موجود بالنت سووها غيركم وضيعوا وقتهم من غير فايدة  .. 

* البرمجة : 

لغة المادة / المادة درسناها بالانقلش وخاصة بكلية الحاسب ..

المادة عبارة عن كتابة اكواد ( الكود = يعني الاوامر الي راح تكتبينها عشان البرنامج يتنفذ حسب اوامرك ) .. المادة تعتمد اعتماد اساسي على الفهم ما فيها شي ينحفظ .. هي الاساس لسنواتك الجاية في التخصص واساس مشروع التخرج تبعك .. راح يكون شغلنا على برنامج الـ Netbeans .. هذا البرنامج خاص بلغة الجافا مره سهل ويعلمك اذا كتبتي الكود غلط + وين الغلط + كيف تصححين الغلط .. 

بقولكم تجربتي مع هالمادة أول ما دخلت الكلية  .. أكثر البنات كانوا يعانون من هذي المادة وكانت نسبة الرسوب فيها جدا كبيرة وكثير بنات سبوها لي حتى اتذكر وحده قالت لي اذا رسبتي في هذي المادة ف هذا شيء طبيعي وروتيني لا يضيق صدرك  أغلب البنات احملوها ودرسوها مره ثانيه  .. المادة أيضا جزئين جزء عملي وجزء نظري  .. ف دخلت أول كلاس بافكار جدا سلبيه عن المادة وكنت مره خايفة خصوصا انه اول كلاس لي في التخصص  خذنا أول كلاس وكانت لغة البرمجة اول ++C هي اصعب من لغة البرمجة الحالية JAVA .. التيتشر كان شرحها حليو بس بطيئة  و كنت احاول بقدر الامكان أفهم منها بس عجزت والتفت للبنات الي جنبي واسالهم فاهمين يقولون ايه  .. بعد هذا الكلاس بيومين يجي كلاس العملي وهو تطبيق على الكمبيوتر للي خذناه بالجزء النظري وكان كل كلاس عملي لازم تقيم وعليه درجات وكل بنت على جهاز لحالها .. وتعطينا التيتشر سؤال واحنا نحله .. هنا انا ماعرفت احل لاني مو فاهمة شي بالنظري وبديت افكر وقلت اذا جاء النهائي وش بسوي الحين تونا بداية الترم يقالك سهل وهذي اهم مادة في تخصصي ما عرفت احل السؤال .. وخذت صفر في التقيم الاول  .. بعدها بديت اشتغل على نفسي ونسيت الكلام السلبي عن المادة  وبديت اذاكر من الكتاب لانه يشرح كل شيء بشكل تفصيلي بعكس السلايدات كانت جدا مختصرة  وطحت على أستاذ في اليويتوب اسمه عبدالله عيد      مافيه احد متخصص حاسب ما يعرفه  .. من بعد ربي هو كان سبب نجاحي في المادة .. له بلوق خاص فيه ينزل كل درس ويشرح فيديو وعملي قدام عينك وبالعربي بعد .. وكنت اشوف الفيديو تبع الدرس الجاي وانا في السياره بروح للجامعة وادخل الكلاس وانا فاهمه الدرس الي راح تشرحه التيتشر وكذا تسهل علي طريقة الفهم .. 

متطالبتها /

الجزء العملي ما اتذكر كم عليه  :

تقيم وقت المحاضرة + واجبات + مشروع (4 درجات )  + فاينل عملي .. 

الجزء النظري : 2 ميدز ( 10 درجات الميد الاول + 15 درجة الميد الثاني ) + مشاركة وحضور وغياب + 3 كويزز + فاينل نظري (40 درجة) .. 

نصيحة / 

1. لا تهملون هذي المادة واحرصوا تذكرونها اول بأول لو عن طريق فيديوهات الاستاذ عبد الله عيد هنا  ما تاخذ من وقتك اكثر من 5 دقايق أسلوبه واضح ويفهم ويوصل المعلومة بشكل سريع ما شاء الله عليه الله يجعلها بموازيين حسناته  

2.  الواجبات فيه حسابات كثير بالتويتر يحلونها لك لكن حاولوا تحلونها بانفسكم ترا بتفيدكم في فاينل العملي تكونين تعودتي على الاسئلة وكتابة الكود  ..

عارفة اني طولت عليكم بس حبيت اكسر الخوف والتوتر من المواد الي راح تاخذونها ان شاء الله ..
واعطيكم خلفية كامله عنها  .. بالتوفيق  .. 

Read More