مستوى 2

السلام عليكم ورحمة الله وبركاته 

كيف حالكم ؟ ان شاء الله مرتاحين  ..

في هذا البوست ان شاء الله راح اتكلم عن  المواد الدراسية تبع مستوى ثاني من ناحية 

لغة المادة + مدى صعوبتها + متطلباتها + نصائح تمنيت أحد عطاني اياه قبل اخذ المادة  ..

في مستوى ثاني راح تدرسون 6 مواد بالنسبة للي ماراح تحذف أو تضيف مادة .. 

* الثقافة الاسلامية : 

المادة موحدة على جميع كليات الجامعة  يعني لو حابة تاخذينها من كليه ثانية غير كلية الحاسب عادي لان الفاينل موحد لكل الكليات 

لغة المادة / المادة درسناها بالعربي .. 

المادة متوسطة الصعوبة .. المذاكرة كانت من كتاب من تاليف الدكتورة نوال العيد موجود بجميع المكتبات وكان سعره رخيص ب 33 ريال  .. محتوى المادة كان يتكلم بشكل عام عن تاريخ الامة الاسلامية واخلاق المراة المسلمة وأركان الايمان .. المواضيع كانت سهله ومفهومه لكن الصعوبة كانت في كمية المعلومات والكلام والادلة الموجوده في الكتاب وكنا مطالبين بحفظ الكتاب كامل عشان الاختبارات..  

متطلباتها / 

 ميد واحد (25 درجة) : اغلبه صح وخطا و اختياري و سؤالين عددي وسؤال بونس  .. 

المشروع (10 درجات) : يختلف من شعبة لشعبة على حسب التيتشر وايش تبغى احنا طلبت منا نكتب تقرير عن احد اخلاق الرسول صلى الله عليه وسلم مثلا الصدق نكتب دليل عنه + قصة عن صدق الرسول صلى الله عليه وسلم + أثر هذا الخلق لو طبقناه في مجتمعنا صاحبتي طلبت منهم تيتشرتهم يسون قروب ويختارون درس ويسون عليه عرض بوربوينت ويشرحونه  .. 

الاختبار الشفهي (5 درجات ) : بداية المحاضرة تختار بنات عشوائيا وتسالهم عن الدرس الي فات  ..  

الحضور والغياب والمشاركة (5 درجات ) .. الواجبات (5 درجات ) ..
الفاينل (50 درجة ) :نزلت في صفحة المراجعة اسئلة العام الماضي ركزوا عليها جابوها لنا نفسسها بالضضبططط حتى نفس الترتيب  .. 

نصيحة / 

مثل ما انتو شايفين الفاينل عليه 50 درجة.. وكثير بنات احملوا المادة من اغلب الكليات .. ف عشان كذا لازم تشدون حيلكم في اعمال السنة وتجيبون مجموع عالي لان غالبا فترة الفاينل تكونين تعبانه ومرهقة من اختبار قبله أو شايله هم الاختبار الي بعد السلم .. أتذكر انا اختبرت السلم بعد الماث على طول وكنت وقتها طاقتي كلها راحت على الماث ورجعت تعبانه ونمت على طول وما ذكرت السلم كويس .. 

* اللغة الانجليزية : 

المادة موحدة على جميع كليات الجامعة  يعني لو حابة تاخذينها من كليه ثانية غير كلية الحاسب عادي لان الفاينل موحد لكل الكليات  .. 

لغة المادة / درسناها بالانقلش أكيد  .. 

المادة كانت جدا سهله حتى لو ما كان عندك خبره في الانقلش  .. المذاكرة كانت من كتابين فيه شعب تدرس الكتاب الازرق وشعب تدرس الكتاب الموف أسهههل بكثييير  التيتشر تقيم مستوى الشعبة وتختار لهم الكتاب عاد انتي وحظك  .. صعوبة المادة تكون من التيتشر نفسها انا درستني وحدة مرره متساهله معنا وطيبه بس حريصة على الحضور والغياب بعكس صديقتي كانت الي تدرسهم مصعبه عليهم المنهج ومعطيته أكبر من حجمه  .. المادة لها موقع خاص فيها اسمه اتوقع emudo تقريبا نفس النظام الاكاديمي تبع موقع الجامعة بس هذا خاص بمادة الانقلش فقط تقدرين تشوفين فيه درجاتك وساعات غيابك .. 

متطلباتها / 

اختبار Writing الكتابة (10 درجات): تختار موضوع ونكتب عليه 5 جمل فقط موضوعنا كان عن كيف يحتفل المسلمون بعيد الفطر .. 

اختبار Reading القراءة (10 درجات): قطعة وعليها اسئلة .. 

اختبار Speaking المحادثة (10 درجات): تسالك اسئلة عامة عن أسرتك وافضل اصدقائك وايش هدفك في الحياة  .. 

اختبار Listening الاستماع (10 درجات): تعطيك قطعة وبعض كلماتها ناقصة وتقرا القطعة كاملة وانتي تكتبين الكلمات الناقصة على فكرة القطعة جت من الكتاب.. 

الحضور والغياب والمشاركة (5 درجات) .. الواجبات (5 درجات ) ..
الفاينل (50 درجة ) : نزلت أوراق في صفحة المراجعة نفس اسئلة الفاينل بالضبط .. 

المادة ما فيها مشروع  

* التفاضل والتكامل :

لغة المادة /المادة درسناها بالانقلش والمادة من كلية العلوم .. 

المادة للاسف كانت جدا صعبة.. ما ابغى اخوفكم بس عشان ما تنصدمون وتشدون حيلكم .. كير بنات اشتكوا من المادة واحذفوها وضطروا ياخذونها صيفي عشان يتفرغون لها أكثر .. المادة لها جزئين جزء عملي وجزء نظري .. نفس الدروس الي اخذناها بالثانوي بس بشكل أعمق .. تتكلم عن التكاملات وكيف تكاملين المعدلات .. المشكلة الاولى الي واجهتنا من المادة ما كان فيه شعب كثيرة ف كان الكلاس الواحد فيه 70 طالبة وأكثر  لدرجة تيتشرتي حذفت الكويزات واضافت درجة الكويز مع الميد عشان ما تقعد تصحح الكم الهائل من الورق.. المشكلة الثانية التشابترات كانت مررره كثييررة والوقت ضيق وما يسمح نخلصها كلها ف اضطروا التيتشرات يخلصون تشابتر واحد في محاضرة وحدة  .. مستوعبين يعني تقريبا 4 دروس ناخذها بمحاضرة وحده مدتها ساعتين حسبي الله عليهم ضغطونا.. المشكلة الثالثة أغلب دروسنا مو مشروحة بالعربي في النت أو اليوتيوب او تكون مشروحة بطريقة ثانية .. ف صار هذاك الوقت فيه ازمة بحث عن مدرسات خصوصي .. المادة يبيلها صبر وطولة بال.. اي شي ما فهمتيه من تيتشر النظري روحي لتيتشر العملي تشرحه لك اتذكر فيه بنات يحضرون مع شعب ثانيه زي اكسترا كلاس عشان تثبت المعلومة ويفهمون اكثر .. لا تغيبون كثير ترا كل درس مرتبط باللي قبله ..  

متطلباتها /  

الجزء النظري (40 درجة) 

2 ميدز ( 15 درجة لكل ميد) : على حسب كل تيتشر واسئلتها .. 

2 كويزز (5 درجات لكل كويز) : احنا حذفته وادمجت درجته مع اختبار الميد وصار الميد من 20 .. 

الجزء العملي (10 درجات) : قسمتها حضور ومشاركة وغياب (5 درجات) + كويز (5 درجات) .. 

الفاينل ( 50 درجة ) :اخر السنة يوم بدوا يرصدون مجموع اعمال السنة كثير بنات كانوا يحتاجون 30 درجة أو اكثر عشان بس ينجحون في المادة وجاء الفاينل وكان صدمة سهل + اغلب الاسئلة جت من امثلة الكتاب ونفس الارقام بعد واسئلة الكتاب الي هو الجزء العملي ما جاء منه شي  .. 

المادة ما فيها مشروع 

نصيحة / 

ما أدري وش أقول وش أخلي .. الا هالمادة لا تهملينها لانها تاثر 4 على المعدل شدي حيلك فيها مرره وحاولي تفهمين كل شي وابحثي عن الي مو فاهمته بالنت ..اذا مره ما فهمتي شي وتحسينك ضايعه في المادة اسالي البنات عن تيتشر تشرح زين في الجامعة واستاذني منها انك تحضرين محاضرتها للاستفادة فقط  .. 

* تصميم منطق رقمي : 

لغة المادة / جميع مواد كلية الحاسب ندرسها بالانقلش  .. 

المادة أنا اشوفها صعبه بس تقدرين عليها  .. تدرون وين صعوبة المادة في منسقة المادة نفسها مصعبتها علينا حسبي الله عليها .. المادة تعتمد بشكل أساسي على مادة بمستوى اول كانت بالخطة القديمة اسمها " مقدمة في الحاسب " بس حذفوها مع الخطة الجديدة .. كان أول تشابتر سهل بالنسبة لنا لان تقريبا كله درسناه بالمقدمة .. المذاكرة كانت من الكتاب موجود في المكتبات وكان 20 تشابتر وثقيل ما احتجنا الا 5 تشابترات يعني اطبعوه افضل لكم يكون أكبر واخف عليكم  كان فيه سلايدات بس جدا مختصره .. المادة كانت تتكلم عن الانظمة والدوال وكيفية تبسيطها وكيفة رسمها وتحليلها وتصميمها .. المادة تحتاج تطبيق عملي عشان نفهمها وللاسف التطبيق مو موجود بجامعتنا فيه جامعة عندهم مثل جامعة الملك سعود .. المادة لها جزئين جزء عملي وجزء نظري .. النظري كانت الي تدرسنا الله يسامحها تشرح كل شي بالتفصيل الممل واحنا مو عارفين ايش السؤال من الجواب ولا كيف نحل .. تدرون كل مره ادخل المحاضره وانا مجهزة نفسي واشرب كوفي بس عشان افهم واطلع مثل ما دخلت مو فاهمه شي.. اكتشفت أغلب البنات كذا وكل الشعب بعد المادة تعتبر سهله وممتعه بس الي يشرحونها غير مؤهلين تماما أو مو عارفين يوصلون المعلومة .. كانت المادة اشبه بالشيء الخيالي .. جاء اول ميد لنا وكلنا درجاتنا سيئة ولا وحده جابت زين او كامل .. بعدها بديت اشتغل على نفسي وهمشت دور التيتشر.. بديت اول شي ابحث بالنت ولقيت نفس كتابنا مشروح بالعربي وسهل الفهم .. وحصلت استاذ مصري باليوتيوب يشرح المادة بشكل جميل وسهل بعدها صرت اذاكر منهم .. بالنسبه للجزء العملي كان محاضرة وحده في الاسبوع مدتها ساعة نحل معها اسئلة الكتاب فقط ما كان فيه تطبيق على اجهزه .. 

متطلباتها / 

الجزء النظري :

2 ميدز (15 درجة لكل ميد) : شامل كل شي صح وخطا + اختياري + ارسمي + حللي .. 

2 كويزز (5 درجات لكل كويز) + كويز بونس (3 درجات)  .. 

الجزء العملي : 

الواجبات (5 درجات) : اتوقع كانت 5 واجبات كل واحد اصعب من الثاني وتقريبا كل واجب فيه 8 اسئلة  .. 

المشروع (15 درجة) : سؤالين مطلوب حلهم على 3 برامج وكان فيه مناقشة للمشروع .. 
الفاينل ( 40 درجة) : صح وخطأ واختياري + تبسيط داله وارسميها + رسم decoder + رسم multiplexer + السؤال الاخير عليه 7 درجات من الدرس الاخير من تشابتر 5 .. 

نصيحة / 

1. حاولوا بقدر الامكان تشدون حيلكم في اعمال السنة وتجيبون مجموع عالي لان الفاينل كان صعب  ويحتاج وقت وتفكير والوقت كان ضيق وفيه تصحيح الي بعد واتذكر العام قالوا حتى الفاينل حقهم صعب وذاكروا له كويس ولا تهملون شي  .. وانا اذاكر للفاينل كان فيه شي اقول لا مستحيل يجي وفي الاخير جاء وكان عليه 7 درجات  ..  

2. نزلت الكتاب وقناة الاستاذ المصري تبع اليوتيوب في صفحة المراجعة شيكوا عليها  ..

* لغة البرمجة (2) : 

لغة المادة /جميع مواد كلية الحاسب ندرسها بالانقلش ..  

مكملة لبرمجة 1 بس متعمقة أكثر .. من وجهة نظري اذا ما تأسستي كويس في برمجة1 عادي بتمشين في برمجة 2  لانها ما تعتمد عليها كثير بالعكس كانت مختلفة تماماً واصعب من برمجة 1.. نستخدم نفس البرنامج Netbeans .. نفس طريقة برمجة 1 في جزء نظري وجزء عملي تطبيق على الاجهزة وفيه تقيم كل محاضرة عملي ..

راح تدرسون كيف تسون أكثر من كلاس وتربطونهم في بعض ( الوراثة ) وكيف تحفظون كلام في ملف وتقرون من الملف وأجمل شي راح تتعلمون كيف تسون ويندو (نافذة) يعني مثلا كنتي فاتحه الرسام ولا حفظتي شغلك صح تجيك رساله هل تريد الحفظ ؟ زي كذا يعني  ،، الخ .. بقولكم شغله من درست برمجة 2 وانا ما شفت الرن كان كله يطلع ايرور كل البنات كذا حتى التيتشر ما صارت تطلبه  .. المذاكرة كانت من السلايدات .. تحتاج المادة مذاكرة أول بأول كل درس مرتبط باللي قبله لو ما فهمتيه ماراح تفهمين الدروس الجاية كلها .. اي شي ما فهمتيه ذاكريه من قناة الاستاذ عبدالله عيد.. الواجبات كانت صعبه شوي أو تقريبا طويله فلا تهملونها وحلوها أول بأول لانها بترفع درجاتك حتى لو كانت خطأ .. وعلى حظكم حذفوا فاينل العملي وخلوا عليه مشروع.. 

متطلباتها / 

الجزء النظري (25 درجة) : 

2 ميدز ( الميد الاول 10 درجات + الميد الثاني 15 درجة ) : كانت موحدة وشاملة كل شي وكل الميدين كان فيه كتابة كود .. 

الجزء العملي (35 درجة) : 

التقيم (10 درجات ) + الواجبات (10 درجات ) + المشروع (15 درجة) + بونس (3 درجات )  ..  

الفاينل ( 40 درجة) : السؤال الاول اختياري + صح وخطأ السؤال + الثاني كانوا معطينا رسم بياني وعليه اسئلة حلها بيكون سطر بس بصيغة كود + السؤال الثالث كان كتابة كود الكود الاول مثل نظام الكاشير ويحسب كم الفاتورة وسوي عليه array الكود الثاني اكتبي  سوبر كلاس .. 

نصيحة / 

الفاينل كانت الاسئلة طويله والوقت جدا ضيق واغلبه كتابة كود .. في صفحة المراجعة نزلت اسئلة اختبارات ميدز مع حلها صحيح اغلب اسئلة النظري جت منها وجاء نفس سؤال الكود بالضبط في الفاينل  .. 

* أخلاقيات المهنة : 

لغة المادة /  جميع مواد كلية الحاسب ندرسها بالانقلش ..  

هذي المادة الي درستها وخلصتها وانا مو فاهمه منها شيء  .. المادة كانت نظرية بحته .. تحتاج حفظ ومخ فاضي.. يعني على حسب الطالبة هي تقرر اذا صعبة ولا  سهله .. أنا بالنسبة لي كانت صعبه لاني ما احب احفظ والمعلومة تطير بسرعه .. المادة تأثر 1 على المعدل فقط يعني لو ما جبتي فيها كويس ماراح تأثر كثير على المعدل  .. المذاكرة من السلايدات فيه تيتشرات قالوا ذاكروا من الكتاب بس طنشوهم لانهم ما يجيبون منه شي والسلايدات كثثثيرة ودسمة .. تتلكم عن نظريات والهكرز والفيروسات والايميل .. مدتها ساعة وحدة كل اسبوع يعني انتبهوا تغيبون كثير ولا بينزل لكم حرمان .. أول ما تنزل لكم وفيه شعب فاضيه خذيها لا تحذفينها لان على وقتي كان معنا بنات من مستويات عاليه مستوى 4 و 5 وحصل لهم تعارض في الفاينل صار عندهم اختبارين فاينل بنفس اليوم بس باختلاف الوقت فقط .. دور التيتشر ما يهم في هالمادة لان ما فيه شي ينشرح كلها كلام وسواليف ..    

متطلباتها /  

         2 ميدز ( 15 درجة لكل ميد ) : كان صح وخطأ واختياري فقط .. 

الواجبات (5 درجات ) : كان الحل أون لاين وكانت صعبه تحتاج وقت وتفكير لحلها خصوصا ان الاجوبه تعتمد على حسب انتي وش فهمتي من المحاضرة مو من السلايدات  ..
المشروع (ه25 درجة) : عبارة عن بحث لمشاكل اجتماعية و اقتصادية يعاني منها أغلب دول العالم البحث (15 درجة) + مناقشة المشروع(5 درجات) +عرض بوربوينت (5 درجات) ..  
الفاينل (40 درجة) : كان صح وخطأ واختياري فقط .. 


سولفت كثير  .. ان شاء الله اكون عطيتكم خلفية كاملة عن المواد ومتطالبتها والطابع العام لها ..